蘋果：維基解密爆料 美國關注香港 上至政黨 下至鹹網

感謝維基解密！感謝你踢爆梁振英09年就想參選特首（不過我覺得89年嗰陣佢經已咁諗）；感謝你披露曾鈺成原來是民建聯裏面的開明派（但底線係阿爺未出聲佢就唔會表態）；今次嘅密件仲有好多好料，唔講咁多，即刻去片：

政黨篇 曾鈺成被指開明派

民建聯有民主派？八方以為自己睇錯，但維基解密披露美國駐港總領事館文件，引述民建聯前主席曾鈺成以及佢嘅愛徒李慧琼同張國鈞係黨內開明派，支持擴大功能組別選民數目，但領事館人員心水好清，喺文件寫明無論黨內有幾多唔同意見，民建聯未摸清阿爺底線前都唔敢就政改表態，事實證明冇錯吖。領事館對香港政治生態描述好地道，索性直譯梁國雄同陳偉業做「 Long Hair（長毛）」同「 Big Guy（大嚿）」，唔知美國政府睇完會唔會爆頭？

保安篇 實俄鋁來港上市

美國政府自稱世界警察，乜都管餐飽。俄羅斯企業「俄鋁聯合」去年初來港上市，仲未掛牌，美國駐港總領事館已率先上報最新情況，引述消息指俄鋁債務不穩，又涉有組織犯罪，所以港交所要延遲佢上市日期等云云。

至於死對頭伊朗，去年2月一份資料亦披露美國部門曾向本港海事處查詢，有冇來自伊朗嘅船舶進入本港海域。當時處長譚百樂話冇，但就話至少有兩間伊朗船公司在港註冊。

另一份文件更睇到原來美國好關注香港會唔會冇水用，擔心阿爺供水會乾塘，建議改革水制，兼插手管理東江水，確保食水安全，咁即係叫港府河水犯井水？

樞機篇 北京憂教廷影響力

維基解密踢爆唔少政府秘聞，本港教會亦走唔甩。據維基解密透露，一向甚為低調、負責香港教區與教廷的聯絡工作的梵蒂岡駐香港代辦人劉裕政（ Monsignor Eugene Nugent），曾向時任美國駐香港總領事郭明瀚（ James B. Cunningham）講，陳日君樞機公開宣佈想退休時，教宗其實未話畀佢走，當時有梵蒂岡人員擔心，一旦陳樞機退休，可能會影響佢為內地宗教自由發聲的權威。

劉裕政又話，教宗講明樞機有支持香港民主同為教宗提供中國政策建議的角色。唔知係咪因為咁，北京當局曾對佢計劃將辦公室由香港島搬到位於九龍較大的地方相當緊張，擔心梵蒂岡計劃增加在港影響力喎。

奇趣篇 查究雅虎禁止鹹網

美國政府一直留意香港，估唔到連對香港上唔上到鹹網，都有興趣。維基解密一份文件揭示美國駐港總領事館去年1月引述報章報道，指香港雅虎同微軟會嚴格過濾網上發放嘅色情資訊，韓國同印度等都會實施類似措施。

唔知點解領事館咁緊張，即刻搵香港雅虎同微軟求證，前者解釋因為香港法例禁止發佈淫褻文章和圖片；後者就話喺部份亞洲保守國家都會執行，唔只香港㗎。話晒兩間公司都係美國品牌，到時禁止唔到鹹網，隨時俾人話打壓資訊自由，領事館關注下都好正常嘅。

蘋果日報，2012年09月14日
http://hk.apple.nextmedia.com/news/art/20110905/15585226